«Кедентранссервис» New Silk Way форумында жүк тасымалдарын цифрландыру тәсілін таныстырды
Астана, 2026 жылғы 15 қазан. «Кедентранссервис» АҚ-ның цифрландыру және терминалдық қызмет жөніндегі басқарушы директоры Даир Амиров VIII New Silk Way бизнес-форумында «Цифрлық терминалдан цифрлық First & Last Mile жүйесіне дейін: жүк тасымалдарын басқарудың бірыңғай экожүйесі» тақырыбында баяндама жасады. Баяндама «Автомобиль көлігімен жүк тасымалдаудың цифрлық экожүйесі» атты панельдік сессия аясында ұсынылды.
Өз сөзінде Даир Амиров логистиканы цифрлық трансформациялаудың негізгі бағыттарын атап өтіп, автомобиль және теміржол тасымалдарын терминалдық инфрақұрылыммен біріктіретін жүк тасымалдарын басқарудың бірыңғай экожүйесін қалыптастыруға баса назар аударды.
Заманауи цифрлық шешімдерді, соның ішінде Terminal Operating System (TOS), First & Last Mile және GPS-мониторинг жүйелерін интеграциялауға ерекше көңіл бөлінді. Оларды кешенді қолдану жүктерді нақты уақыт режимінде бақылауға, жеткізу мерзімдерін болжауға және логистикалық процестерді оңтайландыруға мүмкіндік береді. Бұл тәсіл тасымалдардың ашықтығын арттыруға, бос тұрып қалу уақытын қысқартуға және клиенттерге қызмет көрсету сапасын жақсартуға ықпал етеді.
«Кедентранссервис» АҚ-ның форумға қатысуы цифрлық технологияларды енгізу, интеграцияланған логистикалық шешімдерді дамыту және Қазақстанның көлік-логистика саласының тиімділігін арттыру мәселелері бойынша кәсіби диалогтың бір бөлігі болды.
